சைக்கிள் புராணம்

முந்தைய பதிவில் சொன்னபடி நான் சைக்கிள் வாங்கும்போது 6 கியர் வைத்ததற்கும், சாதா சைக்கிளுக்கும் ரூ.1000/-  மட்டுமே வித்தியாசம் இருந்தது. கியர் வைத்த சைக்கிள் ரொம்பவே ஆடம்பரமாக தோன்றினாலும் அதனாலும் நிறைய பலன்கள் உள்ளன. அவற்றையும், பத்ரியின் பதிவில் அவர் குறிப்பிட்டுருந்த அசௌகரியங்கள் குறித்த எனது கருத்துக்களையும் இதில் பார்க்கலாம்.

ஒரிஜினல் சைக்கிளில் ரேஸ் சைக்கிளுக்கு இருப்பதுபோன்ற வளைந்து நெளிந்த கைப்பிடிகளைக் கழட்டிக் கடாசிவிட்டேன்.

இது சரியல்ல என்பது என் எண்ணம். இம்மாதிரி வளைந்த கைப்பிடிகள் தொலைதூரம் செல்லும்போது ரொம்பவே உதவியாக இருக்கின்றன. மேலும் போக்குவரத்தில்லாத சாலையில் செல்லும் பட்சத்தில், ஓட்டிக்கொண்டிருக்கும்போதே சற்று இளைப்பாறவும் இவை உதவுகின்றன.

உட்காருவதற்கு என்று ஜெல் வைத்த மெத்து மெத்தென்ற சிறப்பு இருக்கையைப் போட்டுக்கொண்டேன்.

இதைப்பற்றி சைக்கிள் வாங்கும்போதே கேள்விப்பட்டேன். ரூ. 600 என்று சொன்ன ஞாபகம். நன்றாக சைக்கிள் ஓட்டும்பட்சத்தில் பார்த்துக் கொள்ளலாமென்று வாங்காமல் விட்டுவிட்டேன். ஆனால் இவர் எழுதியிருப்பதை பார்க்கும்போது வாங்கவேண்டுமென தோன்றுகிறது. பார்க்கலாம் !

இருள் சூழந்த நேரத்துக்காக பேட்டரியால் இயங்கும் ஒரு விளக்கு.ஒரு நல்ல ஹெல்மெட்

விளக்கு தற்சமயம் என்னிடமில்லை. அவசியம் வாங்கவேண்டும். ரொம்பவே தேவைப்படுகிறது. ஹெம்மெட் என் தலை அளவுக்கு கிடைக்கவில்லை! உங்க தலை சைஸ் ரொம்ப பெரிசு ஸார், ஆர்டர் பண்ணிவேணா பார்க்கலாம் என்று சொன்னார்கள். மேலும் அந்த ஹெல்மெட்டினால் என்னவிதமான பாதுகாப்பை நாம் பெறுகிறோம் என்பதை உறுதிசெய்துகொண்டு வாங்கலாமென்றிருக்கிறேன்.

சென்னையின் காலநிலை பற்றி குறிப்பிட்டுருந்தார். அதையெல்லாம் பார்த்தால் வேலைக்கு ஆகாது. ஏப்ரல், மே மற்றும் ஜூன் மாதங்களில் சைக்கிளில் அலுவலகம் போன்ற நாம் நன்றாக தோற்றமளிக்க வேண்டிய இடங்களுக்கு செல்வதில் பயனில்லை. வேண்டுமானால் வார இறுதிகளில் அதிகாலையில் நல்ல தூர பயணங்களை ஆத்திரம் தீர மேற்கொள்ளலாம். மற்ற மாதங்களில் (மழை நேரம் தவிர) நிச்சயம் ஓட்டலாம். ரொம்பவே வியர்க்கும் நான் சொல்கிறேன்; நம்புங்கள்! மழை நேரங்களில் சைக்கிளை தவிர்ப்பது மனநலத்திற்கு நல்லது!

குண்டு குழியான சாலைகள் சைக்கிள் ஓட்டுவோருக்கே எளிது என்று நினைக்கிறேன். மற்றவர்களெல்லாம் தடார் தடாரென்று குழிகளில் விட்டு செல்லும்போது மிகக்குறைந்த அதிர்வுகளுடன் நான் எளிதாகவே கடந்து செல்கிறேன். ஆனால் தொடர்ந்த பழக்கத்தின் மூலமே இது சாத்தியமாகும். குறைந்தது 3 மாதங்கள் என் கணக்கில்.

சக பயணிகளைக் குறித்து ரொம்பவும் அலட்டிக்கொள்ளக் கூடாது. சைக்கிள் ஓட்ட ஆரம்பித்த புதிதில் ரொம்பவே பயப்படுவேன். கார்காரர்கள் அல்லது பைக்காரர்கள் வேகமாக வந்து மோதிவிடுவார்களோ என்று. ரியர்வியூ கண்ணாடி இல்லாமல் ஓட்டுவதால் வரும் பழக்கமின்மை என்று நினைக்கிறேன். ஏனென்றால் இப்போதெல்லாம் அவ்வளவு பயப்படுவதில்லை. சாலை திருப்பங்களில் சற்று கவனமாக இருக்கவேண்டும். ஏனென்றால் வேகமாக வரும் சகபயணிகளுக்கு அந்த திருப்பங்களில் ஒருவன் சைக்கிளுடன் மெதுவாக முன்னேயோ அல்லது எதிரிலோ எதிர்பார்க்கமாட்டார்கள் இல்லையா? நிறையமுறை மணியை உபயோகித்து கொள்ள வேண்டியிருக்கிறது.

பிரேக் அடித்தபின் சைக்கிளை திரும்ப கிளப்புவது கடினம்தான். ஆனால் கியர்வைத்த சைக்கிளில் அந்த பிரச்சனை ரொம்பவே குறைவு. கொஞ்சம் கவனமாக முதல் கியருக்கு ஏற்கனெவே வந்திருந்தால் எளிதாக கிளப்பிவிடலாம். பொதுவாக நான் சாலைகளில் 2 கியருக்கு மேல் செல்வதில்லை. நெடும்பயணங்களுக்கு மட்டுமே 5, 6 என்று செல்வது. சில சமயம் போக்குவரத்தில்லாத நேரங்களிலும் பயன்படுத்திக் கொள்வேன்.

கியர் வைத்த சைக்கிள்கள் பராமரிப்பு செலவு வைக்கின்றன என்று ஒரு தவறான எண்ணம் பெரும்பாலோருக்கு உள்ளது. அது தவறு. நான் சைக்கிள் வாங்கி 1.5 வருடங்கள் ஆகிவிட்டது. இதுவரை சர்வீஸ் என்று எங்கேயும் கொடுத்ததில்லை. 3 முறை பஞ்சர் ஒட்டியது தவிர வேறு எந்த செலவும் இதுவரை வைத்தில்லை. மொத்தம் எப்படியும் ஒரு 250 கிலோ மீட்டருக்கு மேல் ஓட்டியுள்ளேன்.

ட்ராய் திரைப்படத்தில் ”You concentrate on your sword and his sword. nothing else” என்று சொல்வதுபோல நம் சைக்கிளையும், நம்மை சுற்றி செல்லும் வாகனங்களையும் மட்டும் கவனித்துக்கொண்டு சென்றால்தான் சைக்கிளில் செல்லமுடியும். மற்றபடி, யார் ஹெல்மெட் போட்டுக்கொண்டிருக்கிறார்கள், யார் குறுக்கே வந்து ப்ரேக் அடிக்கிறார்கள், அடித்தட்டு, மேல்தட்டு, கிளித்தட்டு என்று பார்த்துக் கொண்டிருந்தால் நமக்குதான் கஷ்டம். சிக்னலில் நிற்கும்போதுகூட சிக்னலை மீறுவோருக்கும் சேர்த்து வழிவிட்டு இடப்புறம் ஓரமாக நின்றுகொள்வேன். எனக்குமே அதுதான் பாதுகாப்பு.

மற்றபடி, சைக்கிளில் செல்வது உடலுக்கு நன்றாகவே இருக்கிறது. எளிதாகவும் இருக்கிறது. டிராஃபிக் ஜாம் பற்றிய கவலைகள் இல்லை. சாலைகளில் யூ டர்ன் எடுக்கும்போதுகூட இறங்கி தள்ளிக்கொண்டே நடைபயணியாகி தாண்டிவிட முடிகிறது. என்ன ஒன்று, எங்கள் அலுவலகத்தில் நிழலுடன் கூடிய சைக்கிள் நிறுத்தம் இல்லை. புகை பிடிப்பவர்களுக்குக்கூட நிழற்குடை அமைத்து கொடுக்கும் கருணையாளர்கள் எங்களையும் மதித்தால் நன்றாக இருக்கும். இப்போது நிழலுக்காக கீழ்தளத்தில் இரண்டு தளங்கள் இறங்கி சென்று நிறுத்த வேண்டியுள்ளது. திரும்ப வரும்போது முதல் கியரில் ஏறிவருவதால் உடலுக்கு நல்ல உடற்பயிற்சியாகிறது!

உடல் பெருத்த, முதுகுவலியால் இன்னமும்கூட சிரமப்படுகிற, நான் சொல்கிறேன், சைக்கிள் வாங்குங்கள்! ரொம்பவே பயனுள்ள விஷயம்!